domingo, 19 de mayo de 2013

Juan Cenizas

Xcuent Juán xkiti.
Juan Cenizas (FRAGMENTO)
Edición revisada

     Kwyo tu xáa name nii pcholë Juán. Tir xtsyaab xáa, nonsyke lo xkiti chaa xáa. Per tsiñee lëë xáa kwroob, lëë xñaa xáa blëë lo xáa pornii xtsyaab xáa âan kâkty xáa kuñ xáa tsiiñ par kûñ xáa gán tumi.

    Per túutyee tsew, lëë Juán kwyoxko dyôn xa kûñ xáa gán tumi par nii klëëdre xñaa xáa lo xáa. Tu wtse name lëë Juán pchoo, nládzy Juán dyôn pe kuñ Juán. Kwsob ka xáa chu nëz, tsiñee lëë xmós réy kwtedy chu nëz. Tsigo lëë Juán sinal xáa sit sît, nládzy xáa dyôn pe cos kûñ xáa.
 
    Singó sí Juán tsiñee lëë Juán psaladzy kuní xñaa xáa xáa wyág chu kiy go. Âan nô tu letsy ngol kik kiy ni nôw nis. Âan kîndy pa kchóo maw.

     - ¡Ah!, -nládzy Juán-, lë gâanoo lëën kolân xkwáy xmós réy par kîzh xáa naa kakyubaa ma.

Per como lëë tsé ptsyêl, lëë xmós réy sígak. Kex xânkiy go name nak tu lo letsy. Lëë xáa ptsêñ sikó.

     Lëë Juán kwsoblan xitsy tu yág. Kon Juán lëë xmós réy táwxtsee âan loxsye táw xáa, lëë xáa kwlii xab kwáy. Tsiñee lox kwlii xmós réy xab kwáy, lëë xáa blâa ma âan kuy Juán pa lo kwlek xáa ma. Kuxi gaa Juán ma ksâsy ma. Pchoow gaa Juán tu xikw yag. Xtsily Juán xirastre ma par nii kâk nyóody dyôn pa nëz sí ma.

     Tsiñee ptsiñ Juán kik kiy, psëëb kaa Juán ma ksâ ma. Pxob kaa Juán tublë yág laanii kwtedy ma par nii kchilody kchóo ma. Sey gaa Juán xlidzy. Mbëë kuutkesy Juán.

    Wor nii byaani lyu, lëë xmós réy sikyub kwáy. Per tsiñee ptsiñ xáa laanii kwlêk xáa ma, kindy ma. Kwë xáa kwëkyub xáa ma tañ tsonre tsé. Xtsildy ma. Lëë stu tsé lëë tu xcombañer xáa chëb:

     - Lëën kânabtiits tu yu nii sob kaangue dyôn pe kwtejty xkwáy no sikó.

Tsiñee ptsiñ xáa chu yu go name, tusy Juán nîx lo xkiti. Kwnâbtiits kaa xáa lo Juán, chëb xáa:

     - Tsáapke lëë wo, ¿pe kwtejty xkwáyaa chu liidzyoo nú?

Kwëb kaa Juán, chëb:

     - Kwtejty ma, per xáa nsiñaa. Deel skizh reyaa, lëën knîy pa nëz sí ma.

     - ¿Pa lal jkaal? - chëb xmós réy- ¿deel kân ló xáa dyôn pe skizh xáaw?


Kwëb kaa Juán, chëb:
  
     - Tu xigpey centáb plat jkan. Tsigó kniyaa pa nëz si ma.

     - Mbay, chëb xmós réy.

Bi gaa xáa, lëë xáa sey.

Más en: «Cultura y Sociedad de Quioquitani»

No hay comentarios:

Publicar un comentario

Gracias por participar en este blog, su comentario ha sido recibido. En breve será moderado.